Te laat vir sulke gedagtes … gaaap

Dis na my slaaptyd en ek is wakker. Die helikopter het eers weer ‘n paar draaie hier kom vlieg en dan kan ek nie slaap nie. So dan lê ek nou maar en dink aan dinge, en spesifiek aan al die dinge wat ek so op die blogosfeer van lees. Ja natuurlik ook aan my skuldgevoelens oor al die dinge wat besig is om op te hoop omdat ek so baie tyd op die blogosfeer spandeer. Maar nou ja dit daargelaat.

Uiteindelik draai my gedagtes noodwendig na die situasie hier in die land. Hier in my ou geboorteland waar die dinge nie meer is soos wat ek dit ervaar het toe ek grootgeword het nie. Nie dat dit noodwendig sleg is nie, maar daar is tog ‘n paar dinge wat mens grief, soos byvoorbeeld die subtiele onderdrukking van ‘n mens se kultuur.

Vat nou byvoorbeeld die naamsveranderings. Elke keer as die media praat van Tswane instede van Pretoria voel dit vir my ek pop my deksel. En dan is Potchefstroom ook nou nie meer Potchefstroom nie. Dit lê my nogal na aan die hart want dis my voorsate wat daardie dorp gestig het en sy naam vir hom gegee het.

Die jong mense wat vandag hier groot word sien ‘n ander Suid Afrika as wat ek gesien het. Ek het hoop gehad vir hulle, want, het ek gedink, hulle is nie vasgevang in dieselfde web van rasse haat as my generasie nie. Hulle word nou saam in dieselfde skole met gelyke omstandighede groot. Maar ek was naïef. Die eerste keer wat dit my getref het, was toe ‘n vriend van my se 11 jarige seun so uitvaar teen sy swart medeleerders in die skool. My vriend vertel my toe dat die seun van hom totaal rassisties is.

By ‘n ander geleentheid ondervrae ek toe ‘n klomp jong studente wat ek op ‘n stand raakloop wat die situasie is. Is daar nog rassisme onder die lede van hulle generasie? Ja, wedersyds, is hul antwoord. Daar sak my moed in my skoene. Hierdie jong mense het nie die voordele van die apartheid ervaar nie en tog word hulle nou weens hulle kleur op die kantlyn geskuif. Die gevolg is dat die rassisme weer van voor af opvlam. Met ander woorde the subtiele onderdrukking van kultuur onder die vaandel van opheffing veroorsaak weereens rasse haat.

Leer die owerhede dan nie uit die foute van ander nie? Lees hulle nie hul geskiedenis boeke nie? Die wiel draai. Eendag sal die bordjies weer verhang word. Hoe harder jy probeer om iemand te onderdruk hoe sterker word hy en hy sal weer opstaan. St Peterburg het Leningrad geword en toe later weer St Peterburg. Eendag gaan Potchefstroom weer Potchefstroom wees en Pieterburg weer Pieterburg. Pretoria sal Pretoria wees en dalk sal selfs hierdie lughawe weer Jan Smuts lughawe genoem word.

Madiba het probeer om versoening te bring tussen die verskillende kulture. Versoening beteken dat die kulture almal saam kan bestaan en nie mekaar verdruk nie. As sy beleid van versoening nie slaag nie dan gaan Suid Afrika in ‘n eindelose siklus verval van onderdrukking en bevryding. So land het geen blink toekoms nie.

So waarvoor sloof ek my af? Hoekom word ek nog opgewonde oor die potensiële positiewe situasies wat daar kan bestaan in SA? Nee wat dan pak ek liewer my goed en waai. Daar is ander lande in die wêreld waar my kultuur meer beskerming geniet as in my geboorteland.

Jy glo my nie? In Kanada is daar wette wat die multikulturele karakter van Kanada beskerm. Onder hierdie wette word ek die vryheid gegee om my Afrikaanse kultuur uit te leef selfs al woon ek in Kanada as ‘n Kanadese burger. Ek kan Afrikaans wees en hoef nie daarvoor om verskoning te vra nie.

So wat maak ek hier? Miskien moet ek liewer gaan slaap. Mens mag nie na jy slaaptyd oor sulke dinge dink nie.