Ek blog nie meer nie, ek woer nou net.

Nee, nee, moenie verkeerd verstaan nie. Dis nie dat ek nou gaan ophou nie.

Die woord “blog” val nie vir my so lekker op die tong tussen die ander Afrikaanse woorde nie, veral omdat dit nie die Afrikaanse “g” bevat nie maar die Engelse “g” wat nie so lekker pas nie. As mens dit met die Afrikaanse “g” uitspreek dan klink dit weer amper soos “bog”. Wie wil nou hê sy of haar blog moet met bog verwar word?

So toe dink ek mens moet ‘n mooi Afrikaanse woord kry vir “blog”. Soos almal weet kom “blog” van “web log” af. So wat is dit in Afrikaans? Seker maar ‘n “web joernaal”. Dis 3 lettergrepe, veels te lank. Nou kom ons maak dit korter en noem dit ‘n “woernaal”. (Ek sit nou al klaar en giggel terwyl ek dit skryf.) ‘n Woernaal is dan nou ‘n mens se blog. Die werkwoord blog is dan sommer net om te “woer.” Vandaar die opskrif. Nou wat is ‘n blogger dan? Ag seker maar ‘n “woeraar”.

Hier is huiswerk. Skryf bietjie … die gebloggery van die bloggers op hulle blogs. OK ek sal maar die antwoord gee: Die gewoer-woer van die woeraars op hul woernale.

So wat dink julle daarvan?