Burgerskap in God se volk

Op ‘n stadium was daar iewers die vraag wat die definisie van ‘n Christen is. Wel die term beteken eenvoudig dis iemand wat Christus navolg, iemand wat volgens die leerstellinge van Jesus Christus lewe. My vermoede is egter dat die oorspronklike vraag eerder handel oor wanneer iemand gered is, met ander woorde wanneer iemand sal hemel toe gaan. Ongelukkig is nie almal wat hulleself Christene noem noodwendig gered nie. So wat is dan nou die vereistes om gered te wees of hoe werk dit?

Uit die aard van die saak is die antwoord op so vraag van uiters dogmatiese aard. Daar kan baie uiteenlopende opinies oor die saak weet. Die manier wat ek dit hier beantwoord is hoe ek dit verstaan en hoe ek dit glo.

Die Bybel leer vir ons baie duidelik dat nie almal uiteindelik hemel toe sal gaan nie. Nou goed, miskien glo jy dat God in stryd met die Bybel gaan handel en uit liefde en genade aan almal toegang tot die hemel gaan gee. Ek is nie egter bereid om daardie risiko te loop nie.

Daar is dus een of ander vereiste waaraan voldoen moet word om toegang tot die hemel te verkry. Hierdie vereiste is egter baie eenvoudig. Mens moet bloot glo in die evangelie van God. Dit kom basies daarop neer dat Jesus Christus, wat self God is, as mens vir ons sondes kom sterf het en weer uit die dood opgewek is. Op hierdie manier het Jesus vir ons die prys betaal vir die sondelas en sodoende vir ons toegang verdien tot die hemel.

Om dus hierdie toegang te verkry moet mens bloot dit glo. Nogtans is die proses om van ‘n ongelowige in ‘n gelowige te verander nie triviaal nie. Dit moet gepaard gaan met ‘n opregte besluit om mens te bekeer. Die woord bekeer kom daarop neer dat mens ophou om op die ou sondige manier te lewe en om volgens Jesus Christus se lewensbeginsels te lewe. Nou lyk dit seker soos ‘n teenstrydigheid want ek het dan nou sopas beweer dat dit genoeg is om te glo. Dis juis hoekom hierdie besluit om te glo nie triviaal is nie. Want geloof bepaal mens se handelinge. Daarom kan mens uit iemand se handeling sien of so persoon werklik glo. Om dus van ‘n ongelowige lewenswyse oor te gaan na die lewenswyse van ‘n gelowige is dus asof mens ‘n totale nuwe lewe begin. Om hierdie rede word hierdie oorgangsproses baie maal as ‘n wedergeboorte beskryf.

Hierdie besluit om ‘n gelowige te word en die stap wat ‘n mens neem om dit te doen is suiwer iets wat mens uit jou eie keuse doen. Niemand forseer jou om dit te doen nie, ook nie God nie. God mag deur omstandighede en mense ‘n las op jou hart plaas om die besluit te neem, maar die uiteindelike besluit is jou eie.

Nadat jy egter die besluit geneem het skop daar baie kragtige dinge in werking. Die eerste ding is jy ontvang die Heilige Gees. Wat beteken dit? Dit beteken dat deurdat jy die besluit geneem het jy toegang kry tot al God se hulpbronne wat deur die Heilige Gees aan jou geskenk word. Dis amper asof jy nou ‘n USB konneksie het tot God se krag en wysheid. Natuurlik is jy nogsteed in beheer van die mate waartoe dit aan jou geskenk word. Jy het ‘n volume kontrole waarmee jy dit kan beheer. Een van die dinge wat jy deur hierdie krag kry is geloof. Met ander woorde, om die eerste stap te neem moes jy self geglo het, maar nadat jy die stap geneem het word jou geloof deur die Heilige Gees in stand gehou. Jy kan dit natuurlik met jou volume kontrole afdraai as jy wil, maar jy het toegang tot die krag van God om jou deur die moeilike tye te dra.

Verder word jy nou ‘n lid van die liggaam van Christus. Jy kry burgerskap tot God se volk. Gold se volk bestaan uit al die gelowiges dwars oor die hele wereld, ongeag van watter Christen kerk of denominasie hul ook al aan behoort. God werk deur die mens van sy volk. Dit is daarom voordelig vir enige gelowige om in kontak te bly met die ander lede van die volk, ander gelowiges.

Nou kom ons by ‘n baie belangrike aspek van die burgerskap in God se volk. As mens eers ‘n lid van die liggaam van Christus geword het kan jy dit nie sommer maklik weer verloor nie.  As jy daardie volume kontrole so ver afdraai dat jy feitlik niks meer van die Heilige Gees in jou lewe ervaar nie, kan jy die pad byster raak en afdwaal. In sulke gevalle gaan God egter uit sy pad om die afgewaaldes weer terug te bring. In die Bybel word daar vertel van hoe hy 99 skape sal agterlaat om die een verlore skaap te loop soek en hoe daar fees gevier word wanneer daardie een verlore skaap gevind is. Die enigste manier om werklik jou burgerskap tot God se volk te verloor is om die sonde teen die Heilige Gees te pleeg. Dis onomkeerbaar. As mens dit reggekry het dat kan jy nie weer ‘n lid van God se volk word nie. Om egter die sonde teen die Heilige Gees te pleeg moet jy regtig baie ernstig besluit om teen die Heilige Gees se werking weerstand te beid en daarmee te volhard.

As iemand dus nou vir my vertel dat hy of sy op ‘n stadium ‘n Christen was en toe opgehou het om ‘n Christen te wees, dan weet ek dis een van 3 moontlike gevalle:

1. Of die persoon was nie regtig ‘n Christen nie en het maar net ‘n halfhartig oorspronklike bekering gehad;
2. Of die persoon is nogsteeds ‘n Christen maar het die volume kontrole baie laag afgedraai en afgedwaal van die pad af. So persoon moet maar net weer die volume kontrol opdraai en terugkeer.
3. Of die persoon moes die sonde teen die Heilige Gees gepleeg het. Dis egter baie selde die geval en beslis nie die geval as die persoon duidelik soekend is nie.

Mens kan ook tussen die eerste twee gevalle onderskei bloot op grond van die mate waartoe God in die persoon se lewe aan die werk is. As God baie aktief besig is om die persoon te probeer terug lei dan is kans goed dat dit die tweede geval is. Alhoewel God aan enigiemand sal werk om so persoon te probeer red, doen God baie meer moeite in ‘n verdwaalde gelowige se lewe om so persoon te probeer teruglei.

Ek hoop dit gee so bietjie van ‘n beter prentjie van hoe Christenskap werk en wat ‘n Christen is.