Nog nie heeltemal nie

So op die vooraand van die verkiesing, ‘n verkiesing wat as baie belangrike beskou word, vind ek myself, ten spyte van ‘n algemene politieke voosheid, geamuseerd deur een van die onlangse politieke inskrywings, en spesifiek een sinnetjie wat in die inskrywing verskyn het. (Jammer Boendoe. )

Sien, die saak staan so. Ek, Flippiefanus, het uit eie keuse teruggekeer na SA vanuit Kanada en na vele wroegings oor die saak het ek uiteindelike besluit om my hier te hervestig en nie weer na Kanada toe terug te keer nie. Hoekom? Want (as ek nou daardie sinnetjie by Boendoe kan leen),

die land is nog nie heeltemal moer toe nie.

Nee wag, julle verstaan nog nie. Kyk bietjie na die volgende soortgelyke stellings:

• Die hoofkelner kom by die man en sê vir hom, “Meneer, hou moed, u biefstuk is nog nie heeltemal verbrand nie.”
• Die bediende kom by die vrou en lig haar in, “Madam, die wasmasjien, hy is nog nie heeltemal stukkend nie.”
• Die polisieman vertel die man, “Moenie bekommerd wees nie meneer, u huis is nog nie heeltemal afgebrand nie.”
• Die dokter staan voor die ouers en in ‘n poging om hulle te bemoedig sê hy, “Julle seun is nog nie heeltemal dood nie.”

Ek dink op hierdie stadium kry julle die prentjie. Een ding wat uitstaan is die oorverdowende gebrek aan ‘n sug van verligting. Die ironie van die saak is dat ons dit werklik as ‘n troos beskou.

Beteken dit dat ek nou weer my goedjies gaan pak om Kanada toe te gaan? Nee, en as jy vir my vra hoekom nie, wat anders kan ek sê as: Suid Afrika is nog nie heeltemal moer toe nie. Hoop net nie dis profetiese woorde nie.