Groen

Groen is die kleur van lente. In die lente kom die blare uit met so sagte liggroen. Eers is daar net so suggestie van ‘n groen skynsel. As mens in die oggend in die straat ry en al die witstinkhoutbome gee daardie ligte groen skynsel dan laat dit mens sommer vars voel.

In die somer kry die bome dan ‘n diep groen kleur. Dit is die kleur van groot bome wat magtig dog rustig en selfversekerd jaar vir jaar op hul plek staan. Dit is die kleur van sekuriteit en beskerming. So op die warm somersdag vorm die groen so kontras met die diepblou van die wolklose hemel.

In die laat some en vroeg herf kry die groen bome so vol ryk kleur. Dit is die kleur wat van rypheid spreek; wat getuig van die opbrengs; die vrug van al die geswoeg van die somer; ‘n kleur wat sê: “dit is volbring.”

Meng groen en blou dan kry jy turkoois, my gunsteling kleur. Dit is die kleur van die see. Die kleur wat jy sien net voor daardie branders breek en die rotse met sy sproei doop.

Groen is ook die kleur van mos en biesies wat rondom mere groei. Dit spreek van die vogtigheid wat voed en laat leef. Dit herhinner mens aan die reën wat water gee en aan die riviere wat die water afvoer.

Let vandag bietjie op na alles om jou wat groen is en sê dankie daarvoor.