Dominee glo nie meer nie

Party keer pla iets jou, maar jy kan nie jou vinger daarop plaas nie. Ag nee wat, dink jy, dis sommer twak, sommer maar vooroordele. So jy probeer daarvan vergeet en met ‘n glimlag saam met die ander die byeenkoms geniet. So was dit met my toe ek die erediens bygewoon het. Baie predikante bid met oop oë, so hoekom sal dit my nou pla? Dan jare later hoor jy van die skandaal. Die gemeente ly aan skok. Daar is selfs van die mense wat nou geloofskrisisse ervaar oor wat gebeur het.

Om ‘n predikant (pastoor, priester, watookal) te wees dink ek nie is aldag maklik nie. Mense dink dis ‘n maklike lewe, ‘n soft job, want al wat jy moet doen is om elke Sondag jou preek te gee en dat die gemeente sal sorg vir jou inkomste. Predikante doen baie meer as om net te preek, maar dit is nie waar die probleem lê nie.

‘n Predikant is ‘n professionele Christen. Die res van ons is Christene bloot omdat ons uit eie dit so gekies het. Vir ‘n predikant is dit ‘n beroepskeuse. Enige Christen word baie maal deur die samelewing fyn dopgehou om te sien of hy nie dalk iets verkeerds gaan doen nie. Indien wel word die vinger na hom gewys. Vir ‘n predikant het so misstap beroeps-implikasies.

Hierdie druk het noodwendig sekere gevolge vir die manier waarop so persoon die lewe benader. Die benadering is nie noodwendig dieselfde vir almal nie, maar mens kry soms dat ‘n predikant ‘n soort dubbel persoonlikheid ontwikkel, een wat vir die gemeente bedoel is en een wat is sy persoonlike lewe gebruik word. By een kerk waar dit die gewoonte is dat die predikant na die diens by die deur gaan staan om die gementete te groet, het dit my getref dat wanneer ek hierdie man groet sy oë altyd toe is. Hy kyk mens nooit in die oë nie. Ek vermoed dat mense hom walg en dat hierdie toe oë sy manier is om afstand te kry tussen hom en die mense in sy gemeente.

Nou het ek ook al opgemerk dat sommige tokkelokke tydens hul teologiese studies hul geloof verloor. (Eintlik beteken dit volgens my dat hulle nooit regtig gelowig was nie.) Wat nou gemaak? Hulle het ‘n beroepskeuse gemaak om ‘n professionele Christen te word en nou ontdek hulle dat hulle nie regtig glo nie. Wel party staak dan maar die studie en gaan doen iets anders.

Party … besluit egter … om die studies … te voltooi.

——————————————-

Waarin anker jy jou geloof? ‘n Vriend, ‘n familielid, of dalk jou predikant? Wees versigtig! Moenie jou vertroue in enige mens plaas nie, nie eers jou predikant nie. Mens kan nie altyd sien wat in mense se diepste gemoed aangaan nie. Plaas jou vertroue op God alleen. Bid en lees jou eie Bybel gereeld. Luister na die Heilige Gees. As jy nie weet hoe nie, onthou elke ware gelowige het die Heilige Gees ontvang. Moenie jou gewete onderdruk nie. Dan sal jy die sensitiwiteit kan ontwikkel om te hoor wat die Heilige Gees vir jou probeer sê.