Wel dog niet herverbruiker

Kry ek nou so lag vir myself.

Ek lees daar by Cobus dat hy homself nou as ‘n verbruiker geklassifiseer het. Dis nou oor al die advertensies wat hy so in die plaaslike koerante lees voordat hy homself sover kan kry om die koerante te loop weggooi … in die asdrom.

Onwillekeurig dink ek nou terug aan my tyd in Kanada en ek wonder wat my Kanadese vriende sou dink as hulle dit sou lees. Ons Suid-Afrikaners het nie ‘n saak nie. Die koerant gaan asdrom toe en ons sal nie eers twee keer daaroor dink nie. Hier is herwinningsprogramme ‘n luukse. As jy iets wil recycle moet jy moeite doen. Daar is nie so iets soos ‘n spesiale vullis-lorrie vir papier of bottels of plastiek nie.

Hoe gemaak as jy nou ‘n gekonformeerde herwinnaar (klink soos ‘n nuwe kerk denominasie) geword het in Kanada en jy kom terug SA toe? Wel as jy soos ek is dan gaar jy op. My motorhuis loop oor van al wat ‘n glasbottel is en daar is ‘n hele hoop kartonboksies van alle vorms en groottes. Eendag, beloof ek myself, sal ek dit alles in my kar laai en loop soek na ‘n plek waar ek dit kan vat vir herwinning. En dan gaan ek myself op die skouer klop en so by myself dink, flippiefanus jy’s nogsteeds ‘n goeie en getroue Kanadees.

Tot daardie dag hoop ek dat my motorhuis nie dalk op ‘n stadium totaal vertop gaan word nie.